Tontosa androany teto amin’ny Lapan’i Mahazoarivo ny lanonana ara-panjakana nanaovana ny fifamindram-pahefana teo amin’ny Praiminisitra teo aloha, Andriamatoa Ntsay Christian sy ny Praiminisitra vaovao, Andriamatoa Jeneraly Zafisambo Ruphin Fortunat. Raha tsiahivina moa dia omaly Alatsinainy, 6 oktobra 2025 no notendren’ny Filohan’ny Repoblika, Andriamatoa Andry Rajoelina ny tenany, handray ny asa maha Praiminisitra Lehiben’ny Governemanta azy. Nandritra ity fotoana ity koa, no namindran’ny Praiminisitra teo aloha ny andraikitra maha Minisitra misahana vonjimaika ny Minisiteran’ny Fitaterana sy Famantarana ny toetrandro ny tenany. Nanatrika izany ireo manam-pahefana maro sy tomponandraikitra ambony sivily sy miaramila eto amin’ny firenena.

 Teny fisaorana niantefa tamin’ny Filohan’ny Repoblika noho ny fahatokisana azy ireo no samy navoitry ny roa tonta nandritra ny lahateniny avy.

Tetsy andaniny, ny Praiminisitra teo aloha dia nanararaotra nisaotra ny vahoaka malagasy, ny mpiara-miasa taminy rehetra ary ny ankohonany niara-nisalahy sy nanampy nandritra izay fotoana nitantanany izay, no sady nitsodrano sy nirary soa ny Praiminisitra vaovao hahavita ny asany an-tsakany sy an-davany.

 Tetsy ankilany kosa, dia nanambara ampahibemaso ny Praiminisitra vaovao fa tsy hiamboho adidy, ka tamin’izany no nanaovany antso avo, nanentana am-pahatsorana sy am-pahendrena ireo mpanao politika rehetra sy ny olom-pirenena tsy ankanavaka, mba hifanome tanana amin’ny fanarenana haingana sy ny hitondrana fanavaozana ho amin’ny tsara kokoa eto amin’ny firenena. Vonona ny tenako hoy izy, hanompo ny tanindrazana sy ny vahoaka malagasy, ka hanatratra miaraka ny fanamby iombonana sy haneho firaisankina hizotra ho any amin’ny fampandrosoana.